WAƘAR YABON HARSHEN HAUSA

Hausar ga dai harshenmu ne

   Harshenmu ko siffarmu ne

       Adabinsa hoton kanmu ne

             Dube mu ko baka gan mu ba

Allah gwani sarkin isa

   Ka nufe ni in je Na'isa

         Ƙofar gari na ci karfasa

              Hausar uwata in yaba

Harshe na Hausa matso ka ji

   Yaren da shi ne yag gaji-

         Da waɗanda yau suka fara ji

              Shi ba dabo ne yin sa ba

In kai nufin zance da shi

   Ka tsaya ka karkaɗe dasashi

          Zaƙi gare shi ya daƙƙashi

               Ba zaka so baka ji shi ba

Ita Hausa yaka taho jaɓe

    Nau'i tili ne rakaɓe-

          A cikinta, ba wani shaguɓe

                Ba zaka gane dukanta ba

A gabas Kananci ne haye

     Sai kattsinanci kewaye

          Hausar Gumal ka ji na tsaye

                Ba wacce ba zan ji ta ba

Hausar Katagum ce gaba

     Ta Hadeja can ma jarraba

          Su ne gabas ko dan gaba

                 Ban san akwai madadinsu ba

Can yamma ka ga akwai Aranci

     Sakkwatanci kwai azanci

           Kurfayanci, Zamfaranci

                   Ban gamo zanensu ba

Haka nan karin harshen Kabawa

     Nan gusun ko da Adarawa

            Na tuno Daurar Dumawa

                    Ba ko zan ƙi faɗarta ba

Zo nan mu je ka ji ɗan'uwa

     Ban so ka je ka yi makkuwa

            Harshenmu bai son ruɗuwa

                   Mai yi ba zai koye shi ba

Taso mu je, ta so mu tai

     Nijje, na je, nittai na kai

            Na ije, na ajje na aje, wai

                 Watta ba Hausarmu ba?

Gintce da gintse, ja haɗe

      Hulla da hula, karkaɗe

             Da Ƙahwa ƙafarka naɗe haɗe

                   Hausarmu ba kurar mu ba

Su ɗuwawuka da ɗuwaiwaka

     Da ɗuwainiya da masarɓaka

             Ma'anarsu ɗai haka yaz zaka

                    Ba mai musu ba mu haushi ba

Kwana shi kai, bacci yake

    Ya tashi, hwalke idon shi ke

             Zai zo shi, zakkowa shi ke

                     Ɗan gwari ba zai ji ki ba

Tamri da tauri namu ne

     Arme a ɗarma waninmu ne

            Dan gobe auren ɗanmu ne

                      Ban san akwai tamkarmu ba

Da wa"in da wannan in ka ji

    Ma'anarsu ɗai a wurin gwaji

          Bari daina neman agaji

                    Ɗauko guda ka iza gaba

Salga, masai shadda duka

    Sayyi fitsari ma haka

          Ɗan ɓulguce, guntu saka

                    Ma'anarsu ɗai mu wuce gaba

A Kano mu ce mata gujjiya

     Ƙwaruru gun wasu ka jiya

           Taɓanni ce dalbejiya

                     Waye ba zai ilmanta ba?

Kai ni bara na tsaya haka

      Yarenmu ai ya haɓɓaka

            Har Hindu har su ƙasar Makka

                     Ba inda ma ba a san shi ba

Mamman Nasar ɗan Ahmadu

       Nai alƙawar kuma ba gudu

              Zan ɗauki Hausa na kai Kudu

                     Yarensu bai kai namu ba

Tammata bi hamdika mai duka

       Nasir ya tsaro baituka

              Dan waƙe Hausa a harsuka

                      Yaren da ban ga kamarsa ba

©Nasir Ahmad Sadiq