WAƘAR KYAUN ALƘAWARI

Ina maka sallama

Ya Baba Buhari miji ga Indo

Na zo ni da lalama

Amsa mini, kar da ka sa ni kwando

Tuni na taho na ma

Ƙafa ɗaya kar mu saka a wando

Waɗanda ka kai sama

Babanmu, suna maka Babarodo

Wa aufu bil Ahad

Haka Rabbi Ya ce, maza je ka duba

A kundi ka tarad-

Da faɗinSa Ilahi ba ka musa ba

Hakan kuma in Arad-

Ta, sani nasa ba wahala yake ba

Ina yi ma tuni

Duka alƙawarinka da kai ka ɗauka

Ka kwana cikin sani

Lallai ka cika kafin ka sauka

Abinci da magani

Fa suna nema su fi kan talakka

Shin Baba kana gani?

Fa farashin fetur ya ƙi sauka

Ka tuno da batun tsaro,

Da ka ce ba shakka za shi samu?

Tashar ruwa can Baro

Ka ce mana zaka yi kar mu damu

Lantarki tasgaro

Nasa, ka ce zaka cire shi kanmu

Ka ce mana aiyuka

Ga matasa kowa za shi sāma

Birni har ƙauyuka

Hanyoyi ka ce, mun tuna ma

Darajar Naira haka

Ka ce sai ta kamo Dala ma

Da rifainare duka

Gyaransu ina daɗa dai tuna ma

Harkar noma

Da kai ta faɗi, yau Baba ina ta dosa?

Ilimi, ƙasa har sama

Shin wai harkar ga ina ta nausa?

Ƙasar nan tai kama

Da a ce fim ne da ake da wasa

Rashawa, ta'adin kuɗi

Ka ce ba mai kuma yin sa, Baba

Kai ne fa kake faɗi

Ka ja layi ko baka faɗi ba?

Ka sha yin gargaɗi

Sai dai ba ka ɗau hanyar hani ba

To ko dai sai baɗi,

Sannan za kai aikinka Baba?

Har ka fi rabi

Cikin shekarun mulkinka; kana tunawa?

Ka yi wa Allah ka bi

Duk alƙawarinka ka zam cikawa

Ka daure ka yi zubi

Don ko su Wa'e basa iyawa

Ni dai ga shawara

Na baka ka zam ɗaukarta yanzu

Ha'inci, damfara

Su ke hana duk mulki ya wanzu

Ka yi nesa da yaudara

Ita ce ta kashe wancan na dazu

A kul ka bi gambara

Mai saurarenta yana awazzu

Naso ke ma tuni

Don so da ganin girma da ƙauna

Allah ma Ya sani 

Talakawa duk sun yanke ƙauna

Mun yi maka lamuni

Kuma zamu taya ka ka yaƙi 'barna

©Nasir Ahmad Sadiq

      (Mamman Naso)